ខេត្តពោធិ៍សាត់ ៖
គ្រោះរាំងស្ងួតរយៈពេលជាងមួយខែនេះបានធ្វើឱ្យរាំងស្ទះដល់
ការងារបង្កបង្កើនផលស្រូវរដូវវស្សារបស់បងប្អូនប្រជាកសិករ
នៅខេត្តពោធិ៍សាត់
តាមស្រុកមួយចំនួនមិនអាចដំណើរការទៅមុខទៀតបានហើយសំណាបសន្ទូង
និងស្រូវពង្រោះដែលបានប្រឹងប្រែងសម្រុកធ្វើពីដើមដៃនោះត្រូវ
ក្រៀមស្វិតចេញពណ៌ដូចសក់ហាយឡាយ
និងងាប់ជាបណ្តើរៗដោយសារតែខ្វះទឹក ។
ស្ថិតក្នុងស្ថានភាពបែបនេះ
ក៏ដូចជាចងចាំនូវអនុសាសន៍ដ៏ថ្លៃថ្លារបស់សម្តេចអគ្គមហាសេនា
បតីតេជោ ហ៊ុន សែន
នាយករដ្ឋមន្ត្រីនៃព្រះរាជាណាចក្រកម្ពុជាដែលបានលើកឡើងថា
ទុកកង្វល់របស់ប្រជាពលរដ្ឋ
គឺជាទុក្ខកង្វល់របស់រាជរដ្ឋាភិបាលនោះនារសៀលថ្ងៃទី១៤ សីហា
២០១២ លោករដ្ឋមន្ត្រី ស៊ុយ សែម
ក្នុងនាមប្រធានក្រុមការងារគណបក្សប្រជាជនកម្ពុជាចុះជួយខេត្ត
ពោធិ៍សាត់ និងលោកលី ណារុន តំណាងរាស្ត្រមណ្ឌលពោធិ៍សាត់
បានចុះត្រួតពិនិត្យមើលការខូចខាត
និងសកម្មភាពបូមទឹកសង្គ្រោះរបស់មន្ទីរធនធានទឹក
និងឧតុនិយមនៅស្រុកភ្នំក្រវាញ ។
លោកទូច សំបូរ អភិបាលស្រុកភ្នំក្រវាញ
បានរាយការណ៍ថា ចំណោមឃុំទាំង៧ក្នុងស្រុកភ្នំក្រវាញ
មានឃុំចំនួន៥ដែលជួបគ្រោះរាំងស្ងួតខ្លាំងជាងគេ គឺឃុំសន្ទ្រែ
លាច រកាត ព្រងិល និងសំរោង ។
ការងារបង្កបង្កើនផលស្រូវរដូវវស្សាឆ្នាំ
នេះធ្វើបាន៨.៤៤១ហិកតា
គ្រោះរាំងស្ងួតបានបង្អាក់ដំណើរការតាំងពីដើមខែកក្កដា
មកដល់ពេលនេះបានបំផ្លាញសំណាប សន្ទូង
និងស្រូវពង្រោះអស់១.៨១២ហិកតាហើយ ។
កន្លែងដែលមានប្រភពទឹកយើងអាចបូមដាក់ប្រឡាយដើម្បីឱ្យប្រជា
កសិករគាត់បូមបន្តបញ្ចូលស្រែរបស់គាត់បាន
ប៉ុន្តែកន្លែងដែលគ្មានប្រភពទឹក ឬឆ្ងាយពីប្រភពទឹក
និងគ្មានប្រឡាយទៀតនោះមិនដឹងជាមានវិធីសាស្ត្រយ៉ាងណានោះទេ ។
ព័ត៌មានលំអិតនឹងផ្សាយជូននៅពេលក្រោយ
នៅលើទំព័រកាសែតកោះសន្តិភាព
និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM
87.5 ខេត្តបាត់ដំបង៕
0 comments:
Post a Comment