កំពង់ចាម: មន្ត្រីរាជការ កងកម្លាំងប្រដាប់អាវុធនៅតាមបណ្តាមន្ទីរ អង្គភាពនានា ក្នុងខេត្តកំពង់ចាម បាននាំគ្នាទស្សនានៅមុខផ្ទាំងកញ្ចក់ទូរទស្សន៍ក្នុងការិយាល័យធ្វើការ ឬក៏ប្រមូលផ្តុំនៅក្នុងសាលប្រជុំតែមួយតាមអង្គភាពរៀងៗខ្លួន ដើម្បីស្តាប់ប្រសាសន៍បំភ្លឺរបស់សម្តេចអគ្គមហាសេនាបតីតេជោ ហ៊ុន សែន ជុំវិញបញ្ហាព្រំដែនរវាងប្រទេសកម្ពុជា-ប្រទេសវៀតណាម រយៈប្រមាណជាងប្រាំម៉ោង នៅក្នុងរដ្ឋសភានៅថ្ងៃទី ៩ ខែសីហា ឆ្នាំ២០១២។ ជាក់ស្តែង គ្រាន់តែម៉ោង ៨ ព្រឹកភ្លាម សម្តេច ហ៊ុន សែន បានចាប់ផ្តើមមានប្រសាសន៍នោះ មន្ត្រីកងរាជអាវុធហត្ថខេត្តកំពង់ចាម បានប្រមូលផ្តុំគ្នានៅក្នុងសាលប្រជុំរបស់អង្គភាពហើយជាស្រេច បានតាមដានទស្សនាយ៉ាងយកចិត្តទុកដាក់ ដោយមានវត្តមានលោកឧត្តសេនីយ៍ត្រី វ៉ា សារិទ្ធ ជាមេបញ្ជាការកងរាជអាវុធហត្ថខេត្ត កំពុងអង្គុយនៅកៅអីខាងមុខអមជាមួយមេបញ្ជាការរងជាច្រើនរូបទៀតបាន មានប្រសាសន៍ថា មន្ត្រីរបស់យើងដែលបានមកតាមដានស្តាប់ប្រសាសន៍បំភ្លឺរបស់សម្តេច ហ៊ុន សែន រឿងព្រំដែនកម្ពុជា-វៀតណាមនេះមានចំនួនជិតមួយរយនាក់ ហើយនៅតាមបណ្តាមូលដ្ឋានកងរាជអាវុធហត្ថស្រុក និង ស្នាក់ការសន្តិសុខទាំងអស់ក្នុងខេត្តកំពង់ចាម គឺយើងក៏មានការប្រមូលផ្តុំទស្សនាតាមកន្លែងរៀងៗ ខ្លួនដូចគ្នាអ៊ីចឹងដែរ។ ចំណែកមន្ត្រីនគរបាល ខេត្តកំពង់ចាម ក៏មិនខុសពីកងរាជអាវុធហត្ថដែរ គឺលោកឧត្តមសេនីយ៍ត្រី ឆាយ គឹមសុន ស្នងការនគរបាលបានមានប្រសាសន៍ដែរថា យើងមានការជួបជុំគ្នានៅក្នុងសាលនេះចំនួនប្រហែលជាងមួយរយនាក់។ ក្នុងនោះក៏មានមន្ត្រីនគរបាលនៅតាមស្រុក និង នៅតាមវរព្រំដែនក៏លោកបានណែនាំ ឲ្យមានការប្រជុំគ្នាក្នុងអង្គភាពរៀងខ្លួនតាមដានទស្សនា ស្តាប់ប្រសាសន៍សម្តេច ហ៊ុន សែន បំភ្លឺបកស្រាយជុំវិញបញ្ហាព្រំដែនរវាងកម្ពុជា-វៀតណាម។ លោក ជា ក្រូច ប្រធានមន្ទីរព័ត៌មានខេត្តកំពង់ចាមក៏បានឲ្យដឹងដែរថា មន្ត្រីមន្ទីរព័ត៌មានទាំងអស់ក្រៅពីចេញទៅប្រមូលព័ត៌មាននៅតាមមន្ទីរ អង្គភាពជុំវិញខេត្តទាក់ទងនឹងការស្តាប់ប្រសាសន៍បំភ្លឺរបស់សម្តេច ហ៊ុន សែន រឿងព្រំដែនកម្ពុជា-វៀតណាមដែរនោះ គឺយើងបានមកជួបជុំគ្នានៅកន្លែងថ្មីដែលមានទីតាំងស្ថិតនៅមាត់ទន្លេ អ៊ំ ភូមិបឹងកុកទី២ សង្កាត់បឹងកុក ក្រុងកំពង់ចាម ដើម្បីទស្សនាការបំភ្លឺរបស់សម្តេចតេជោតាមកញ្ចក់ទូរទស្សន៍៕ S
0 comments:
Post a Comment