រាជធានីភ្នំពេញ ៖ ប្រភពស្និទ្ធនឹងមន្ត្រីគណបក្សសមរង្ស៊ី និងគណបក្សសិទ្ធិមនុស្សបានប្រកាសឱ្យដឹងថា គណបក្សទាំង២នេះគ្រោងជ្រើសរើសប្រធានបក្សថ្មីជំនួសលោកសម រង្ស៊ី ជាទណ្ឌិត និងជំនួសលោកកឹម សុខា ដែលត្រូវលាឈប់ ហើយលោកទាំងពីរនេះ នឹងត្រូវទៅធ្វើជាប្រធាន និងអនុប្រធានគណបក្សសង្គ្រោះជាតិនាពេលដ៏ខ្លីខាងមុខនៅពេលដែល គណបក្សប្រឆាំងថ្មីនេះ (គណបក្សសង្គ្រោះជាតិ) កើតចេញជារូបរាង ។
មន្ត្រីគណបក្សសមរង្ស៊ីបានឱ្យដឹងងថា នៅពេលក្រសួងមហាផ្ទៃយល់ព្រមទទួលចុះបញ្ជីគណបក្សសង្គ្រោះជាតិជា ផ្លូវការហើយនោះ លោកសមរង្ស៊ី ក៏នឹងក្លាយជាប្រធានគណបក្សថ្មី គឺគណបកសសង្គ្រោះជាតិដែលជាការរួមគ្នាបង្កើតឡើងដោយគណបក្សសម រង្ស៊ី និងគណបក្សសិទ្ធិមនុស្ស គឺនៅពេលនោះហើយដែលគណបក្សសមរង្ស៊ីនឹងធ្វើការបោះឆ្នោតជ្រើស រើសប្រធានថ្មីជំនួសលោកសមរង្ស៊ីដឹកនាំគណបក្សសមរង្ស៊ី ។
មន្ត្រីនៃគណបក្សសិទ្ធិមនុស្ស និងគណបក្សសមរង្ស៊ីបានថ្លែងទៀតថា «ពេលនេះយើងនៅត្រឹមដំណាក់កាលសុំបង្កើតគណបក្សថ្មីទេ (គណបក្សសង្គ្រោះជាតិ) ។ បើកាលណោះក្រសួងមហាផ្ទៃយល់ព្រមឱ្យគណបក្សសង្គ្រោះជាតិ បង្កើតហើយ គឺយើងនឹងមានសមាជរបស់គណបក្សថ្មីបោះឆ្នោតជ្រើសរើសប្រធាន អនុប្រធាន និងរៀបចំរចនាសម្ព័ន្ធ។ គណបក្សថ្មីជាការជ្រោមជ្រែងបង្កើតឡើងដោយគណបក្សសមរង្ស៊ី និងគណបក្សសិទ្ធិមនុស្ស ។
មន្ត្រីគណបក្សសមរង្ស៊ី បានបញ្ជាក់ថា គណបក្សប្រឆាំងទាំងពីរមិនរំលាយទេ ព្រោះមានអាសនៈនៅក្នុងតំណែងព្រឹទ្ធសភា រហូតដល់ឆ្នាំ២០១៨។ ហេតុដូច្នេះនីតិវិធីផ្សេងទៀត គឺនៅក្រោយពេលលោកសម រង្ស៊ី ក្លាយជាប្រធានគណបក្សថ្មីហើយនោះ គណបក្សសមរង្ស៊ី នឹងបំពេញនីតិវិធីធ្វើសមាជ ដើម្បីជ្រើសរើសប្រធានបក្សថ្មី ។ នីតិវិធីនេះធ្វើស្របតាមលក្ខន្តិកៈរបស់គណបក្សដែលមានកាលវេលា ពិតប្រាកដ ចំណែកគណបក្សសិទ្ធិមនុស្សរបស់លោកកឹម សុខា ក៏ដូចគ្នាដែរ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
0 comments:
Post a Comment